香港→米蘭馬爾彭薩機場→埃馬努埃萊二世拱廊→米蘭大教堂→台灣料理→休息站Bauli Grill (S.R.L.)→BEST WESTERN PLUS Quid Hotel Venice Airport
集合之後就去食午餐，領隊話比個適應期我哋，所以第一餐就係去咗一間台灣料理度食中餐，唔係唔好食嘅，不過對於第一次歐遊嘅我哋嚟講失望咗少少。
餐後就要坐三四個鐘旅遊巴去威尼斯，中途有休息站停一停比我哋去下洗手間，Ａ牛亦都喺呢個休息站飲咗佢意大利嘅第一杯咖啡。不過呢，本身入洗手間時無人企喺度收錢，以為呢個係免費啦（意大利大部份廁所都要錢），點知去完出嚟就見到收錢果個企咗喺度，結果都係要放低錢啦。
瞓下醒下就到威尼斯啦，臨入城之前領隊同司機要去比入城費（之後有幾個城市都要咁做），跟住再行駛多一陣就到我哋今晚入住嘅酒店BEST WESTERN PLUS Quid Hotel Venice Airport啦。房間都唔細嘅，不過好唔慣用無浴屏嘅企缸，都唔知點沖涼先唔會整到個廁所成地水。
今晚嘅晚餐係由酒店提供，所以整頓好行李就可以落樓下食。講到食，意大利嘅上菜速度真係超級慢，特別係呢間，食三四度菜，食咗兩個幾三個鐘，加上呢間酒店啲晚餐又唔係話咁好食，仲有，好多人都由上機到而家都無正式好好瞓過，再加埋時差問題，所以好多團友都食食下自己返上房瞓了，而我哋都好好地地食埋個甜品先，話晒第一餐意大利餐嘛！
返上房再整理多一會行李就快手沖涼瞓囉！
返回 意大利十天鴨仔旅 - 行程目錄
第二碟係唔係湯?如果係都幾多料，我上次去東歐D湯好似味精水-_-#
回覆刪除係湯嚟㗎~~都幾好飲~~不過已經唔記得咗大唔大味精了~~
刪除