BEST WESTERN PLUS Quid Hotel Venice Airport→穆拉諾島(Murano)→布拉諾島(Burano)→聖馬可區(San Marco)→Da Bepi→BEST WESTERN PLUS Quid Hotel Venice Airport
今日真係好興奮，因為喺酒店食完自助早餐就正式出發遊覽威尼斯。
意大利人真係好鍾意食火腿，幾乎每一餐都會有，所以呢個早餐都唔例外，另外，牛角包亦係好常見，領隊話如果喺外面食早餐，差唔多所有食店早上都只係會賣牛角包同咖啡。
由於今晚都係住返呢間酒店，所以只係帶隨身物品集合就可以了，然後上旅遊巴坐大約１５分鐘就去到主島，領隊好似話叫「泊車島」。因為成個威尼斯係由好多個小島組成，島與島之間係用船嚟來往，所以旅遊巴只可以去到「泊車島」放低我哋，然後就要到今晚先再用返佢啦。
落咗車，領隊叫我哋先去一去洗手間，因為因間果程船要成４５分鐘，船上係無廁所嘅，所以就算呢個洗手間要比錢都要去咗先。跟住領隊匯合咗威尼斯嘅當地導遊就帶我哋去碼頭，等我哋架遊艇。可能係假期關係啦，個碼頭都係好多人好濟泊，啲遊艇都要輪住停埋嚟。
上咗遊艇之後，我同Ａ牛揀咗船尾嘅通風位置，咁樣會無咁易暈浪嘛，而且睇景都靚啲，跟另一對團友興奮咁影下相就好快過咗４５分鐘，到咗威尼斯嘅第一個景點穆拉諾島(Murano)。
去穆拉諾島(Murano)嘅主要目的，係想比我哋睇下點樣吹玻璃，對於最近先去完沖縄嘅我哋嚟講又無咩特別嘅，反而我係對館主後尾推銷嘅一個不會倒瀉嘅玻璃杯有啲興趣，可惜太貴，買一隻又唔夠靚，於是就放棄咗。
之後大家有大約１５分鐘嘅自由時間，用下呢度嘅免費洗手間同埋欣賞一下呢個島嘅景色。其實得１５分鐘都唔走得遠，中途又被一個全團人都怕咗佢嘅獨男捉住咗幫佢影相（話說呢個男仔自己一個人，初初好多團友都會好心幫佢影相，不過大家後期見佢行近自自然都會避開佢，因為佢話叫你影一兩張相，但實際係影好多張，每個背景要有唔同角度唔同大細，你高抄咗少少都唔得要再影過，位置要超準佢先放過你。。。），好可惜只可以喺附近咁影下相，好快就要返去集合再坐遊艇去第二個島。
返回 意大利十天鴨仔旅 - 行程目錄
沒有留言:
張貼留言
如欲從電郵收取此篇網誌的留言回覆通知，請按「發佈」右則的「通知我」，謝謝！