Starhotels Du Parc→拉士碧芝區(La Spezia)→Vernazza→Monterosso(Church of Saint John Baptist, Ristorante Al Pozzo)→Manarola→AC Hotel Pisa(Esselunga S.p.A.)
喺拉士碧芝區(La Spezia)五鄉鎮嘅最後一個景點就係Manarola，亦即係呢條火車線嘅第二個站，喺未親眼見到之前，領隊就話呢個鎮係最靚嘅，我萬萬都估唔到，呢度原來就係我喺ＦＢ見到人哋貼過出嚟一個好靚嘅地方，之前問朋友，佢話要出海㗎喎，好偏僻㗎喎，所以一直都無諗過個團會包咗呢個地方，一去到個影相住，真係非常之興奮。
講返正題，落咗火車之後，又係人山人海呢！通過了一條長長嘅隧道，等咗一陣先等齊晒啲團友，跟住當地導遊又係講一講呢條村嘅背景同集合地點，然後又帶我哋去海邊，呢一刻我都仲未發現呢度有咩咁靚咁特別㗎。
解散咗之後，領隊補充多句邊個位影相最靚，大家都即係向住果個方向前進，衝到去咁上下一望返轉到，哇！竟然就係我意想不到嘅景點，天公仲要造就了美麗時刻，明信片一樣嘅景色就喺眼前。
不過呢段路都好迫人，加埋一路行一路影，都花咗唔少時間先去到個影相位。去到就見到領隊大人已經化身成為咗攝影師，不停幫團友影相呢！雖然景色分別不大，但係我哋都忍唔住不停係咁影。
到差唔多夠鐘嘅時候，我哋就返去集合地點附近坐下，中途仲見到兩位飯腳姐姐嘆緊咖啡呢！
參觀完晒三個漁村，就要坐火車返拉士碧芝區(La Spezia)總站，匯合返兩母子，然後坐旅遊巴去今晚入住嘅AC Hotel Pisa(Esselunga S.p.A.)啦。喺旅遊巴差唔多駛到去酒店嘅時候，大家都見到有超級市場，於是領隊就特意安排我哋夜啲食飯，比我哋去呢間收夜晚八點嘅超市行下先。
基於我哋都無正識食過啲咩生果，當然要去買返啲嚟食下，我哋只係揀到香蕉，有團友就話見到有士多啤梨好抵！
狂物後整頓一下行李就落去酒店地下食晚餐，原來同日仲有翠明假期嘅團喺度呢，聽聞佢哋個行走方向係同我哋相反嘅，不過，喺度食咗一晚晚飯，就見到我哋個領隊同對方嘅有咩分別，喺度就唔方便講啦。講返個晚餐先，其實又無咩好講，因為都係一個普通嘅意大利餐，上菜速度不過不失啦，都係有啲團友唔食甜品就上樓休息。
返回 意大利十天鴨仔旅 - 行程目錄
沒有留言:
張貼留言
如欲從電郵收取此篇網誌的留言回覆通知，請按「發佈」右則的「通知我」，謝謝！