Mitsui's Blog

喜歡旅遊、喜歡拍照、喜歡發牢騷,什麼話題也會有的一個部落格。

2014年1月27日 星期一

140122 第七本書

拖咗八個月, 終於搞掂第七本書(第六次日本旅行)...
上星期(15/1)做好再落單...本來諗住臨近過年會有排搞...
但係都想搏下過年前收到...點知尋日(21/1)見佢MARK咗發貨,
今日就收到啦...比起佢預計嘅23/1先寄出仲要早咗收到~~

唔知係咪太耐冇整呢, 覺得佢今次啲質素好似差咗啲啲...
但我舊低果啲喺上一次搬屋PACK咗箱到而家都冇拆過出嚟...
所以對比唔到...希望係心理作用啦~~

(有興趣嘅BLOG友可以到呢度睇下: http://www.tintint.com/)


2014年1月12日 星期日

140110 公司年飯

話咁快一年...又到咗公司嘅ANNUAL DINNER...
感覺好似就係半年前左右食完咁....
今年同舊年同一場地...食物亦都九成一樣...
所以都係又唔好味又唔飽的....
一向冇咩抽獎運嘅我...今年亦一樣咩都抽唔到...
整體來講最好嘅都係呢個場地真係好近屋企...
今年放工後, 同一位櫻井FANS交收完,
仲可以返屋企洗落機衫先在過去~~

P.S. 多謝這位櫻井FANS的禮物呢~~ <3



2014年1月2日 星期四

140101 新年快樂

2013年好似過得好快呢...
希望2014可以繼續開開心心~~身體健健康康~~

又係時候做下2013年嘅回顧同埋2014嘅展望啦~~

2013回顧:
一月 - 人生第一次做姊妹見証好友出嫁
一月 - 升LEVEL做舅母
三月 - 娘家家裡大混亂, 親戚出手調解... 
四月 - 重新迷上ARASHI, 有佢哋之後遇到嘅負能量可以比以前快速消解
四月 - 開始迷上P&D的手機遊戲
五月 - 總算成功跟娘家出發到日本旅行, 亦可以順利看到漂亮的富士芝櫻美景
六月 - 娘家家裡再度大混亂, 尋求輔導員幫手...
六月 - 升職
八月 - 日遊麻煩友之會成立三週年
九月 - YAHOO BLOG 宣佈執笠, 要準備大搬遷
九月 - 娘家家裡三度大混亂, 在街上失控...
九月 - 再次買樓
十一月 - 終於的起心肝去做眼科檢查
十二月 - 三度用新相機製作星軌圖很滿意
十二月 - 順利收樓再度上車

2014展望:
1. 希望可以去歐洲旅行
2. 希望可以搵到份更適合自己嘅工作, 唔想再做啲唔係自己範疇嘅TASK...
3. 希望間新屋可以順利開心入住~
4. 希望可以健健康康
5. 希望可以真正實行BODY CHECK計劃...
6. 要配新眼鏡
7. 睇晒所有ARASHI嘅舊番組同櫻井嘅舊日劇, 仲有二宮嘅GANTZ

2014年1月1日 星期三

131231 影星倒數

2013年嘅最後一日, 天色唔錯, 某朋友提議再去影星,
今次出車去石澳影, 真係再一次可以見到滿天星星,
好開心影星成為咗我哋嘅倒數活動...
雖然天氣都幾凍, 不過可以見到咁多星星, 咩都唔怕了~~

石澳呢度有好多好位置可以影星, 不過人都比較多,
都有好多人喺呢晚露營...所以亭果頭都好多電筒光影響...
唯有去返橋口果度影, 而呢個位置亦都有好多人影星...


我都好明白影咗成晚嘅星軌相係唔想比人用電筒破壞...
不過語氣可唔可以好少少呢? 我哋知你哋影緊星,
幾黑都已經離遠就熄咗支電筒...寧願行慢少少, 小心啲...
但你哋班自私嘅人都喺度"渴"我哋,話我哋會阻住你哋影相...
個地方真係你嘅咩? 人哋冇權行嘅?
好啦, 到我哋SET好晒機, 一路影星時, 後面當然都有唔少人行過...
佢哋都係一樣係咁"渴"人熄電筒...但到佢哋走嘅時候...
自私嘅一面就表露晒出嚟...係, 你可以開紅光執嘢...
但唔洗特登搵紅光照過嚟我哋部機呢邊搵人㗎?
仲要長照住我哋側邊個人...而呢個人同佢紅光電筒中間就係我部機...
紅光點唔影響你咁長照我張相都出事啦...結果咪啲石影出嚟係紅色囉...
好啦, 你哋齊人要走...有個男人竟然就開住黃光電筒睇路...
本身我都算, 因為你照唔到我...不過當"渴"我哋個女人叫佢小心影響到我哋嘅時候,
個男人嘅回應就係..."影相大晒咩? 睇唔到路仆死咪仲大鑊"
真係聽到火都嚟...啲人自私到呢...
仲有幾分鐘就完咗2013...唔想同人鬧住交倒數...忍你...

佢哋走晒之後, 我張影咗半個鐘嘅星軌相都比佢哋搞到樣衰咗...
所以我哋都即刻換位再影過...SET好機發現已經到咗2014了...
沒有倒數....不過總算最後都比我影到一張一個鐘嘅星軌,
係就係飛機入鏡多咗啲...但今次構圖同星嘅數量都唔錯~~
所以呢張幾滿意嘅星軌相成為咗我2014年第一張作品~~










131227 重新上車

等咗咁耐, 今日終於收樓啦, 終於上返車, 過多幾個月就唔洗再幫人供樓~
希望今次可以順順利利, 建造一個真正嘅安樂蝸~~
不過呢幾個月就辛苦囉...又要租樓, 又要供樓....真係要超慳先得!!!