141229 聖誕假期

連埋星期六日嘅四日聖誕假期結束啦,
又凍...今日實在唔願返工...
就喺度講下呢個月同呢四日假發生嘅事~

十一月去完旅行返嚟如常工作加班...
如常忙著處理奶奶嘅嘢....
星期六日就打下遊記執下屋...
十二月係聖誕月, 當然仲要忙住幫間屋佈置啦...
但就係咁多嘢做...今年都冇咩四圍去影各大商場嘅聖誕佈置...
感覺有啲可惜....

而家份工咩節日都冇得放早...
冬至,平安夜,除夕通通都放正常時間...
所以22/12果日都係放六點...
呢日下午喺公司買定25/12嘅戲飛,
放工去到奶奶屋企食飯, 食食下佢話個心"拿"住...
然後A牛就同佢去急症室...我就幫佢睇住個孫...
起初以為佢因為皮膚敏感啲藥同化療針嘅藥撞埋...
又或者係醫生講話化療針會影響心臟而咁...
點知經過兩日嘅檢查, 原來係升白針令到蛋白質過多....
於是要住院數天....

就係因為咁...24/12平安夜唔單止冇得放早...
放工仲要去醫院探奶奶, 所以平安夜係冇任何慶祝節目...
我最愛嘅聖誕節就要喺醫院渡過....
不過呢....原來醫院都會有團隊遂間病房入去報佳音, 唱聖歌...
仲有啲小朋友畫咗啲聖誕卡比病人嘅....
果晚都成九點先返到屋企附近食拉麵...

25/12上午奶奶終於出院,
總算下午可以如常去睇戲...
聖誕節緊係睇聖誕電影,
我哋今次就係睇相葉嘅『MIRACLE デビクロくんの恋と魔法』,
其實都係一般愛情笑片, 可能FANS先會鍾意睇...
之後, 原先諗住補返, 出去尖沙咀睇下燈飾...
但因為落雨, 都係喺屋企附近商場行下街算...
順便訂埋27/12嘅聖誕PARTY嘅食物,

雖然奶奶出咗院, 但醫生要佢連續五日返去打針....
所以A牛嚟緊每朝早都要8點幾去到佢媽度再同佢去醫院....

26/12 呢日要準備PARTY嘅嘢,
等A牛返嚟食埋LUNCH就落街買下飲品食物用具果啲,
又喺屋企執下屋咁...仲做咗廁所大掃除...

27/12就係PARTY正日, 瞓夠起身又係等埋A牛返嚟去食LUNCH,
之後就係等朋友嚟啦, 跟住就玩到差唔多夠鐘就落街拎食物,
開餐前嚟個大合照, 食完就玩交換禮物, 好邪呢,
三PAIR人成日抽返自己情人果份, 結果要換嚟換去先得....
之後再玩多一陣, 十點左右就散BAND了...
我同A牛就當然係要將間屋還原~

28/12 老爺話佢呢日陪奶奶去打針, 所以A牛終於可以瞓過夠~
我哋都瞓到夠晒, HEA埋呢日假佢~~
我喺點點印整果啲書仔尋日到咗,今日都順便去拎埋,
之後又寫下遊記睇下電視咁....

四日假咁就完LU, 好唔捨得...
不過2014都好快會完....喺完之前又唔見多架飛機...
今年真係咩事呢? 希望2015一切都會變得美好......