131214 自家佈置

就快到聖誕節啦~~係時候開始為屋企佈置聖誕~~
早前找代購買咗ARASHI 2013年 LOVE CONCERT嘅手燈返嚟,
因為可以變色, 用咗佢嚟佈置棵聖誕樹, 效果都唔錯~XD

131129 滿天星星

前一晚姊妹J話都見到好多星星, 今日天氣亦實在太好,
於是臨時叫姊妹C一PAIR睇下會唔會一齊去影下星星~
因為佢哋有車, 去遠少少都方便啲...

咁各自放工返屋企拎好晒影相工具, 同埋防寒衣物,
十點就出發, 本來都冇咩頭緒去邊好,
姊妹C男友就提議咗去清水灣郊野公園,
果度真係夠晒黑, 一抬起頭, 真係超多星星!!!

成世人都係第一次見到咁多, 相機影出嚟就仲更加多~~
今次呢部新相機S120真係完全將佢嘅賣點發揮晒出嚟...
咩都唔洗煩點SET...就咁轉去星空MODE就得啦....

影完一輪...係時候到星軌MODE啦...因為我自己冇大腳架...
要等A牛影晒我先可以用...而且又唔想阻姊妹C佢哋一PAIR太耐...
所以今次試影半個鐘長嘅星軌算啦...

影完出嚟真係都好靚...同埋睇返星軌個形狀,
我哋今次應該係向咗東面~~下次想影向南嘅形狀,
同埋要試下取景時入埋地平線嘅物品落去個構圖先得....
今次淨星星好似單調咗啲....

喺影緊呢三十分鐘嘅星軌時, 眼見有四架飛機經過...
其中三架入咗鏡...不過亦喺我哋話緊啲飛機阻住晒嘅時候...
正好出現咗一粒流星...我成世人都未見過㗎...
連流星雨都冇成功睇到...雖然呢粒流星出現得非常短暫...
亦影唔低佢嘅出現....但佢到而家依然留喺我個腦入面呢...

131127 棉婚記念

原本今年打算去澳門渡過棉婚紀念日...順便睇埋水舞間,
不過唔知係咪澳門賽車嘅關系, 11月中至12月頭都暫停公演...
既然去到都冇咩好做, 不如留港慶祝算...

咁啱有個朋友最近入咗迪士尼做, 於是就決定入去玩半DAY,
夜晚再睇下食咩好....

咁呢日我哋下午一點半左右入場, 因為亞媽都未去過,
所以佢就跟埋入場, 之後就各自活動....
我哋主力係最近嘅迷離大宅, 仲玩咗兩次添,
其他嘅都係啱時間或者冇咩人排先玩~~

六點左右我哋就出返去奧運站食意粉屋~~
好滿足呢~~